حمداً لله على سلامتك

29.08.09 23:38

هذا وطنّا وحنّا رْجال من دونه
نَبْذل له الروح وِِنْعَمّرْه وِنْصونه

واليا بَغى في وطنّا واحدٍ باغي
لابد نِجْتث راسه من على متونه

وياتاج الامجاد يامحمد يابن نايف
ابلادنا بالولي ثمِّ ابْك مامونه

الامن بك يحتفي والمجد يَفْخر بك
وسيرتك بالعزّ والأمجاد مقرونه

وعلى يدينك وبامر القائد الأعلى
زلزلت الارهاب لين انهدّت ركونه

وحَفَظْك ربّي من اللي جاك وامّنْته
وفجّرْ بنفسه ونفس الغدر مغبونه

وياذايع الصيت يابن الشامخ الساطي
اللي له ارواحنا بالحب مرهونه

نايف سليل المليك اللي حما داره
حتى غدت درّةٍ فالأرض مكنونه

دارِ عسا الله من التخريب يحفظها
وِيْعزّ مِن شَعْبه الوافي يحبّونه

القائد اللي حروف المدح به تسمو
ولجل الوطن والمواطن تَسْهرِ عْيونه

ويوم الخبر جاه جاك وصافحت كفّه
كفّك وشعبه على الشاشه يشوفونه

وهنّاك والشعب من بعده يهنّونك
ومن غيرك اللي قيادتنا يهنّونه

ويدعون له والشعوب المسلمه تدعي
ويرجون ربٍّ جميع الخلق يرجونه

والله يَحفَظْك ياشبل الأسد نايف
اللي له ارواحنا بالحب مرهونه

للشاعر محمد القثام